Mamlaka ya Majisafi na Usafi wa Mazingira Masasi–Nachingwea (MANAWASA) ni taasisi ya maji inayojitegemea inayopatikana na kufanya kazi katika maeneo ya Masasi, Nachingwea, Mangaka pamoja na baadhi ya vijiji vya Wilaya ya Ruangwa kando ya njia za usambazaji kuelekea Nachingwea. Ilianzishwa tarehe 10 Mei 2013 kupitia Tangazo la Serikali Na. 105 na baadaye kurekebishwa kupitia Tangazo la Serikali Na. 826 la mwaka 2019, kwa mujibu wa Sheria ya Huduma ya Maji Safi na Usafi wa Mazingira (Sheria Na. 5 ya mwaka 2019). MANAWASA ni miongoni mwa miradi ya kitaifa.

Kwa sasa, Mamlaka ipo katika daraja la “B” miongoni mwa mamlaka za maji safi na usafi wa mazingira za mijini nchini Tanzania. Katika daraja hili, Mamlaka inagharamia gharama zote za uendeshaji na matengenezo, ikiwemo mishahara ya watumishi wote. Uwekezaji mkubwa hufadhiliwa na mashirika ya kimataifa ya ufadhili, wafadhili mbalimbali pamoja na ruzuku kutoka Serikali ya Jamhuri ya Muungano wa Tanzania.